ಉಡುಪಿ Prajakiran.com: ವೈದ್ಯರೊಬ್ಬರ ಮನೆಯ ಸಾಕು ನಾಯಿಯನ್ನು ಕಳ್ಳನೊಬ್ಬ ಕದ್ದುಕೊಂಡು ಹೋಗುವ
ಚಾಲಾಕಿ ನಾಯಿ ಕಳ್ಳನ ಕೈ ಚಳಕದ ದೃಶ್ಯ ಸಿಸಿ ಕ್ಯಾಮರಾದಲ್ಲಿ ಸೆರೆಯಾದ ಘಟನೆ ಉಡುಪಿ ಜಿಲ್ಲೆಯಲ್ಲಿ ನಡೆದಿದೆ
ಉಡುಪಿಯ ಮಲ್ಪೆ ಸಮೀಪದ ಡಾಕ್ಟರ್ ಸುರೇಂದ್ರ ಶೆಟ್ಟಿ ಎಂಬವರ ಮನೆಯಲ್ಲಿ ಬೆಳಗಿನ ಜಾವ ಈ ಕಳ್ಳತನ ನಡೆದಿದೆ.
ಮುಂಜಾನೆ 4.35 ರ ಸುಮಾರಿಗೆ ಎಲ್ಲರೂ ಮಲಗಿರುವುದನ್ನು ಖಾತ್ರಿಪಡಿಸಿಕೊಂಡ ನಂತರ ಮನೆಯ ಹಿಂಬದಿಯಿಂದ ಒಳಗೆ ನುಗ್ಗಿದ ಕಳ್ಳನು, ಬೆಕ್ಕಿನ ಹೆಜ್ಜೆ ಇಟ್ಟು ಬಂದು, ನಾಯಿಯನ್ನು ಕದ್ದುಕೊಂಡು ಹೋಗಿದ್ದಾನೆ.
ವಿಶಿಷ್ಟ ಹೈಬ್ರಿಡ್ ತಳಿಯ ಈ ನಾಯಿ ಮನೆಯವರ ಅಪಾರ ಪ್ರೀತಿಗೆ ಪಾತ್ರವಾಗಿತ್ತು.
ಬೆಳಗ್ಗೆ ಎದ್ದಾಗ, ನಾಯಿಯನ್ನು ಕಾಣದೆ ಮನೆಯವರು ಸಿಸಿ ಕ್ಯಾಮರಾ ಚೆಕ್ ಮಾಡಿದ್ದಾರೆ.
ಅಲ್ಲಿ ಕಳ್ಳನ ಕರಾಮತ್ತು ಪತ್ತೆಯಾಗಿದೆ. ಕಳ್ಳ ನಡು ವಯಸ್ಕನಾಗಿದ್ದು, ಸದ್ಯ ಈ ವಿಡಿಯೋ ವೈರಲ್ ಆಗುತ್ತಿದೆ.
ನಾಯಿ ಕದ್ದ ಕಳ್ಳನನ್ನು ಹುಡುಕಿಕೊಡಿ ಎಂಬ ಮೆಸೇಜ್ ಉಡುಪಿಯಾದ್ಯಂತ ಹರಿದಾಡುತ್ತಿದೆ.
ನಾಯಿ ಒಂಚೂರು ಬೊಗಳದಂತೆ ಮೋಡಿ ಮಾಡಿರುವ ಕಳ್ಳನ ಚಾಕಚಕ್ಯತೆ ಕಂಡು ಜನ ಬೆರಗಾಗಿದ್ದಾರೆ.