ಧಾರವಾಡ prajakiran.com :
ಆಪರೇಷನ್ ಕಾಂಗ್ರೆಸ್ ಗೆ ಒಳಗಾಗಿದ್ದ ಧಾರವಾಡ ಜಿಲ್ಲೆಯ ನಾಲ್ವರು ಬಿಜೆಪಿ ಜಿಪಂ ಸದಸ್ಯರ ಅನರ್ಹತೆಯನ್ನು ಧಾರಾವಾಡ ಹೈಕೋರ್ಟ್ ಎತ್ತಿ ಹಿಡಿದಿದೆ.
ಹೈಕೋರ್ಟ್ ಏಕಸದಸ್ಯ ಪೀಠದ ನ್ಯಾಯಮೂರ್ತಿ ಕೃಷ್ಣಕುಮಾರ ಅವರು ಈ ಮಹತ್ವದ ಆದೇಶ ಹೊರಡಿಸಿದ್ದಾರೆ.
ನಾಲ್ವರು ಬಿಜೆಪಿ ಸದಸ್ಯರಾದ ಗುಡಗೇರಿ ಕ್ಷೇತ್ರದ ಜ್ಯೋತಿ ಶಿವಾನಂದ ಬೆಂತೂರ, ಗರಗ ಕ್ಷೇತ್ರದ ರತ್ನಾ ಪಾಟೀಲ, ತಬಕದ ಹೊನ್ನಳ್ಳಿ ಕ್ಷೇತ್ರದ ಮಂಜವ್ವ ಹರಿಜನ ಹಾಗೂ ಗಳಗಿಹುಲಕೊಪ್ಪದ ಅಣ್ಣಪ್ಪ ದೇಸಾಯಿ ಅಡ್ಡ ಮತದಾನ ಮಾಡಿದ ಹಿನ್ನೆಲೆಯಲ್ಲಿ ರಾಜ್ಯದ ಚುನಾವಣಾ ಆಯೋಗ ಅವರನ್ನು ಅನರ್ಹ ಗೊಳಿಸಿತ್ತು.
ಇವರು ಜಿಪಂ ಅಧ್ಯಕ್ಷೆ ಚೈತ್ರಾ ಶಿರೂರ ಅವರಿಗೆ ಕೈಕೊಟ್ಟು ಆಪರೇಶನ್ ಕಾಂಗ್ರೆಸ್ ಮೂಲಕ ವಿಜಯ ಲಕ್ಷ್ಮಿ ಕೆಂಪೇಗೌಡ ಪಾಟೀಲ ಅವರನ್ನು ಧಾರವಾಡ ಜಿಲ್ಲೆಯ ಜಿಪಂ ಅಧ್ಯಕ್ಷ ಗಾದೆಗೆ ತಂದು ಕೂಡಿಸಿದ್ದರು.
ಹೀಗಾಗಿ ಅವರ ವಿರುದ್ದ ಆಗ ಅಧ್ಯಕ್ಷ ಸ್ಥಾನದಿಂದ ಪದಚ್ಯೂತಗೊಂಡ
ಜಿಪಂ ಮಾಜಿ ಅಧ್ಯಕ್ಷೆ
ಚೈತ್ರಾ ಶಿರೂರ ಹಾಗೂ ಹಿಂದಿನ ಬಿಜೆಪಿ ಜಿಲ್ಲಾ ಗ್ರಾಮೀಣ ಅಧ್ಯಕ್ಷ ಈರಣ್ಣ ಜಡಿ ಅವರು ಹೈಕೋರ್ಟ್ ನಲ್ಲಿ ಪ್ರತ್ಯೇಕ ತಕರಾರು ಅರ್ಜಿಯನ್ನು ಸಲ್ಲಿಸಿದ್ದರು.
ಅಧ್ಯಕ್ಷ ಈರಣ್ಣ ಜಡಿ ನೀಡಿದ ವಿಪ್ ಉಲ್ಲಂಘಿಸಿ, ಚೈತ್ರಾ ಶಿರೂರ ಅವರು ಮಂಡಿಸಿದ ವಿಶ್ವಾಸ ಗೊತ್ತುವಳಿಯನ್ನು ಬೆಂಬಲಿಸದೆ ಅಡ್ಡ ಮತದಾನದ ಮೂಲಕ ಪಕ್ಷ ವಿರೋಧಿ ಚಟುವಟಿಕೆಯಲ್ಲಿ ತೊಡಗಿದ್ದರು ಎಂದು ರಾಜ್ಯದ ಚುನಾವಣಾ ಆಯೋಗದ ಮೊರೆ ಹೋಗಿದ್ದರು.
ಆಗ ಚುನಾವಣಾ ಆಯೋಗ ಇವರ ಸದಸ್ಯತ್ವ ರದ್ದುಗೊಳಿಸಿತ್ತು.
ಇದನ್ನು ಪ್ರಶ್ನಿಸಿ ನಾಲ್ವರು ಜಿಪಂ ಸದಸ್ಯರು ಹೈಕೋರ್ಟ್ ಮೊರೆ ಹೋಗಿದ್ದರು.
ಅಲ್ಲದೆ, ರಾಜ್ಯದ ಚುನಾವಣಾ ಆಯೋಗದ ಆದೇಶಕ್ಕೆ ಹೈಕೋರ್ಟ್ ನಲ್ಲಿ ತಡೆಯಾಜ್ಞೆ ತಂದು ಗಮನ ಸೆಳೆದಿದ್ದರು.
ಈ ಹಿನ್ನೆಲೆಯಲ್ಲಿ ಅಂದಿನ ಧಾರವಾಡ ಜಿಲ್ಲೆಯ ಬಿಜೆಪಿ ಅಧ್ಯಕ್ಷ ಈರಣ್ಣ ಜಡಿ ಹಾಗೂ ಚೈತ್ರಾ ಶಿರೂರ ಇವರ ವಿರುದ್ಧ ಹೈಕೋರ್ಟ್ ನಲ್ಲಿ ಕೂಡ ತಕರಾರು ಅರ್ಜಿಯನ್ನು ಸಲ್ಲಿಸಿ ಕಾನೂನು ಹೋರಾಟ ನಡೆಸಿದರು.
ಕರೋನಾ ಹಿನ್ನಲೆಯಲ್ಲಿ ನಾಲ್ವರು ಜಿಪಂ ಸದಸ್ಯರು ತಾತ್ಕಾಲಿಕವಾಗಿ ಅನರ್ಹತೆ ತೂಗುಕತ್ತಿಯಿಂದ ಪಾರಾಗಿದ್ದರು.
ಹಲವು ತಿಂಗಳ ಕಾಲ ವಾದ ವಿವಾದ ಆಲಿಸಿದ ನ್ಯಾಯಪೀಠ ತೀರ್ಪು ಕಾಯ್ದಿರಿಸಿತ್ತು.
ಗುರುವಾರ ರಾಜ್ಯದ ಚುನಾವಣಾ ಆಯೋಗದ ತೀರ್ಪು ಎತ್ತಿ ಹಿಡಿದು ಆದೇಶ ಹೊರಡಿಸಿದೆ.
ಇದೀಗ ಹೈಕೋರ್ಟ್ ಏಕ ಸದಸ್ಯಪೀಠ ಅವರ ಸದಸ್ಯತ್ವ ರದ್ದುಗೊಳಿಸಿರುವುದನ್ನು ಎತ್ತಿಹಿಡಿದ್ದರಿಂದ ನಾಲ್ವರ ಸದಸ್ಯತ್ವ ರದ್ದುಗೊಂಡಿರುವುದಲ್ಲದೆ, ಮುಂದಿನ ಚುನಾವಣೆಯಲ್ಲಿ ಸ್ಪರ್ಧಿಸಲು ಅವರಿಗೆ ಅವಕಾಶ ಇಲ್ಲದಂತಾಗಿದೆ.
ಅಲ್ಲದೆ ಬಿಜೆಪಿಯ ಹೋರಾಟಕ್ಕೆ ಜಯ ಸಿಕ್ಕಂತಾಗಿದ್ದು, ಮತ್ತು ಪಕ್ಷ ವಿರೋಧಿ ಚಟುವಟಿಕೆಯಲ್ಲಿ ತೊಡಗಿದವರಿಗೆ ಬಿದಿ ತಾಕಿಸಿದಂತಾಗಿದೆ.
ರಾಜ್ಯ ಸರಕಾರದ ಪರವಾಗಿ ಮಾಜಿ ಅಡ್ವೋಕೇಟ್ ಜನರಲ್ ಸಜ್ಜನ ಪೂವಯ್ಯ,
ಈರಣ್ಣ ಜಡಿ ಅವರ ಪರವಾಗಿ ಅರುಣ ಜೋಶಿ, ಚೈತ್ರಾ ಶಿರೂರ ಪರವಾಗಿ ಅವಿನಾಶ ಅಂಗಡಿ ವಕಾಲತ್ತು ವಹಿಸಿದ್ದರು.
ಈಗ ಮತ್ತೆ ಅವರು ಹೈಕೋರ್ಟ್ ದ್ವಿಸದಸ್ಯ ಪೀಠದ ಮೊರೆ ಹೋಗುವ ಸಾಧ್ಯತೆ ಗಳಿವೆ.
ಈ ಹಿನ್ನೆಲೆಯಲ್ಲಿ ಅರುಣ ಜೋಶಿ ಅವರು ಹೈಕೋರ್ಟ್ ದ್ವಿ ಸದಸ್ಯ ಪೀಠದ ಮುಂದೆ
ಕೆವಿಯಟ್ ಅರ್ಜಿಯನ್ನು ಸಲ್ಲಿಸಿದ್ದಾರೆ.
